Մեթյու Բրայզա. «Հայաստանում տեղի ունեցածը լուրջ հարված է ժողովրդավարությանը»

Ուրբաթ օրը Միացյալ Նահանգների փոխպետքարտուղարի օգնական Մաթյու Բրայզան «Ամերիկայի Ձայն»-ի ռուսական ծառայությանը տրված հարցազրույցում Հայաստանում տեղի ունեցած իրադարձությունները բնութագրեց իբրեւ «ողբերգություն», եւս մեկ անգամ կոչ անելով Հայաստանի կառավարությանը վերացնել արտակարգ իրադրությունը եւ վերականգնել ազատությունը մամուլը:

Թղթակցի այն հարցին, թե արդյոք Հայաստանում տեղի է ունեցել «գունավոր հեղափոխության» փորձ, ինչպես որոշ վերլուծաբաններ են պնդում եւ ինչպես ինքը վարչապետ Սերժ Սարգսյանը հայտարարեց վերջերս, բարձրաստիճան ամերիկացի պաշտոնյան պատասխանել է. - «Այն, ինչ տեղի է ունեցել Հայաստանում, ողբերգություն է, քանի որ զոհվել են մարդիկ: Դա լուրջ հարված էր ժողովրդավարությանը: Դա կարելի է դիտարկել որպես հեղափոխություն կամ որպես լուրջ հասարակական ընդհարում», - ասել է Մաթյու Բրայզան:

Ըստ ամերիկացի դիվանագետի, «ընտրությունները դուրս են եկել բնականոն գործընթացի սահմաններից եւ կարեւոր չէ, թե ինչպես են դրանք անվանվում»:

«Հայաստանում այսօր լուրջ խնդիրներ կան. հասարակությունը երկփեղկված է, կա բեւեռացում, մի շարք մարդիկ ձերբակալված են եւ դատվելու են: Բնականաբար, դրա արդյունքում կան մտահոգություններ` կապված մարդու իրավունքների պաշտպանության հետ», - «Ազատություն» ռադիոկայանին այսօր ասաց Եվրախորհրդի մարդու իրավունքների հարցերով հանձնակատար Թոմաս Համմարբերգը:

«Ակնհայտ է, որ այս ամենի մեջ կա քաղաքական ենթատեքստ: Քաղաքական գործիչների եւ, մասնավորապես, Սերժ Սարգսյանի հետ հանդիպման ժամանակ ես ասել եմ, որ անհրաժեշտ է սահմանափակել ձերբակալությունները: Դատական հետապնդումները պետք է իրականացվեն միայն այն դեպքերում, երբ կան բռնարարքների եւ հանցագործությունների իրական ապացույցներ, այլապես կստեղծվի այնպիսի իրավիճակ, երբ համատարած կասկածներ կլինեն, որ մարդիկ ձերբակալվել են իրենց գաղափարների համար», - ասաց եվրոպացի բարձրաստիճան պաշտոնյան: 

Արտակարգ դրության մեղմացումից հետո էլ թերթերը լույս չտեսան

Այսօր առավոտյան, հակառակ սպասումների, այդպես էլ լույս չտեսան այն թերթերը, որոնք արտակարգ դրության պատճառով չէին տպագրվում, բայց պատրաստվում էին տպագրության` նախագահի հրամանագրում որոշակի փոփոխություններից հետո:

Պատրաստ համարները տպագրության չեն թողել արդեն տպարանում: Այս ճակատագրին են արժանացել «Առավոտ», «Հայկական ժամանակ», «Տարեգիր», «Հայք», «Չորրորդ իշխանություն», «Հրապարակ», «Ժամանակ Երեւան» թերթերը:

Մարտի 14-ին տեղի ունեցան ԱԺ մշտական հանձնաժողովների նսիտերը:

ԱԺ պետական-իրավական հարցերի մշտական հանձնաժողովի նիստում, հանձնաժողովի փոխնախագահ Արտյուշ Շահբազյանի նախագահությամբ, առաջին ընթերցմամբ քննարկվեց «ՀՀ դրոշի մասին» ՀՀ օրենքում լրացումներ կատարելու մասին» պատգամավորներ Արմեն Աշոտյանի եւ Կարեն Ավագյանի ներկայացրած օրենսդրական նախաձեռնությունը: Հիմնական զեկուցող Արմեն Աշոտյանը տեղեկացրեց, որ օրինագիծը լրամշակելիս հաշվի են առնվել կառավարության եւ ԱԺ աշխատակազմի օրենսդրության վերլուծության վարչության առաջարկներն ու դիտողությունները: Նախագծով առաջարկվում է Հայաստանի տարածքում ՀՀ դրոշը այլ դրոշի հետ միաժամանակ բարձրացնելու անհրաժեշտության դեպքում ՀՀ դրոշը բարձրացնել տվյալ շենքի ձախ կողմից (դեմքով դեպի այդ շենքը): Եթե միաժամանակ բարձրացվում են կենտ թվով մի քանի դրոշներ, ապա ՀՀ դրոշը պետք է բարձրացվի մեջտեղում: Եթե բարձրացվում են զույգ թվով դրոշներ, ապա ՀՀ դրոշը պետք է բարձրացվի կենտրոնից ձախ:

Աղբյուր

Հատված Ս.Սարգսյանի 13.03.08 հեռուստաեթերից.

«Ես երբեք չեմ փորձել Մանվել Գրիգորյանին ներքաշել քաղաքականության մեջ: Ես շատ-շատ ափսոսում եմ և ցավում եմ, որ նա, չգիտեմ ինչից ելնելով, փորձեց մտնել քաղաքականություն և փորձ արեց չենթարկվել գերագույն, գլխավոր հրամանատարին: Ես կարծում եմ, պետք է մանրամասները պարզվեն, և խնդիրը պետք է լուծում ստանա»:

Եվրոպական խորհրդարանը երեկվա լիագումար նիստում ձայների 60 կողմ, 1 դեմ եւ 2 ձեռնպահ հարաբերակցությամբ բանաձեւ է ընդունել, որում Հայաստանի իշխանություններին կոչ է անում վերացնել արտակարգ դրությունը:

Եվրախորհրդարանի պատգամավորները նշում են.

Նախագահական ընտրությունների արդյունքները խաղաղ կերպով վիճարկող ընդդիմության կողմնակիցների նկատմամբ ոստիկանների կողմից գործադրված ճնշումները, ի վերջո, հանգեցրին 8 մարդու մահվան եւ տասնյակ վիրավորների: Մարտի 1-ին հայտարարվեց արտակարգ դրություն, եւ լրատվամիջոցների ազատությունը երկրում սահմանափակվեց:

Եվրախորհրդարանի պատգամավորները կոչ են անում անհապաղ կազմակերպել մարտի 1-ի դեպքերի թափանցիկ, անկախ եւ անկողմնակալ քննություն: Սխալ պահվածքի ու քրեական բռնարարքների համար պատասխանատուները պետք է դատարանի առջեւ կանգնեն:

Կար չկար, մի փոքրիկ գյուղ կար: Այս գյուղի տղերքը կռվի մեջ էին հարևան թշնամի քաղաքի տղերքի հետ: Ու ամեն անգամ, երբ քաղաքի տղերքից գալիս էին գյուղի վրա կռիվ, գյուղի տղերքից մի քանի հոգի կարողանում էին կազմակերպվել ու դիմադրություն ցույց տալ: Ամեն կռվից առաջ աղոթում էին գյուղից պարզ երևացող վիթխարի ժայռի Աստվածներին: Այսպես թշնամի քաղաքի տղերքը հասկացան, որ սրանց դեմ դեռ հաղթելու հնար չկա, ու հետ քաշվեցին:

Գյուղում կյանք սկսվեց. մարդիկ այլևս նկուղներում չէին ապրում` կռիվ չկար, վտանգ չկար, սկսեցին գործով զբաղվել` հող էին մշակում, բերքի հույսով ամեն օր բարկ արևի տակ վառվում, խաշվում, բայց ուզում էին վերջապես իրենց աշխատանքի արդյունքը տեսնել: Ու մի օր մեր գյուղի տղերքը, որոնք կռվել ու պաշտպանել էին գյուղը, զգացին, որ իրենք բացի կռվելուց` ուրիշ բան չեն կարող անել: Աղոթում էին ժայռին, բայց նրանց խոսքը տեղ չէր հասնում: Իսկ հիմա կռիվ չկա, այսինքն իրենց գյուղի պաշտպանության համար իր ապրուստը տվող չկա: Ինչ անել… Որտեղից ապրուստ ճարել… Ու գնացին տղերքը գյուղացիների մոտ` իրենց ճակատագիրը որոշելու: Գյուղացիները ցույց տվեցին, որ իրենք աշխատում են, ու արդյունք են ակնկալում, իսկ տղերքը քանի որ չեն աշխատում, մեծ սպասելիքներ պիտի չունենան: Ու տղերքը նստեցին մտածելու: Եթե գյուղացիների ձեռքից խլեն նրանց ունեցվածքը` գործիքները, ապա գյուղացիները չեն կարողանա իրենց բերքն ստանալ, ու բոլորը սովի կմատնվեն: Իսկ այլ բան գյուղացիները չունեն: Ու որոշեցին տղերքը…

Վ. ՕՍԿԱՆՅԱՆ. «ԻՇԽԱՆՈՒԹՅՈՒՆՆԵՐԻ ԵՎ ԸՆԴԴԻՄՈՒԹՅԱՆ ԵՐԿԽՈՍՈՒԹՅՈՒՆԸ ԲԱՑ Է ԹՈՂՆՎԱԾ»

Իշխանությունների և ընդդիմության երկխոսությունը բաց է թողնված: Այսօր լրագրողների հետ հանդիպման ժամանակ այսպիսի հայտարարություն արեց արտգործնախարար Վարդան Օսկանյանը: «Ցավոք սրտի, մենք բաց ենք թողել դրա ճիշտ պահը, չնայած որ այդ շանսն իրականում ունեինք»,- ասաց նախարարը` հավելելով, դրանում ոչ ոքի չի մեղադրում: Արտաքին գործերի նախարարի կարծիքով, եթե այդ պահը ճիշտ օգտագործվեր, Հայաստանին կհաջողվեր ոչ միայն խուսափել մարտի 1-ի իրադարձություններից, այլև` այսօր երկում նորմալ իրավիճակ կլիներ:

Նախարարը վստահություն հայտնեց, որ մի հրաշալի օր, երբ երկիրը սթափվի, հնարավոր կլինի օբյեկտիվ գնահատել ընտրական ժամանակաշրջանում ստեղծված իրավիճակը:

Միևնույն ժաանակ, նա հավելեց, որ երկխոսություն հաստատելու հարցը մշտապես պետք է մնա օրակարգում և դրա լուծումը կախված է նախկին նախագահ Լևոն Տեր-Պետրոսյանից: Վարդան Օսկանյանը վստահություն հայտնեց, որ երկխոսությունը կկայանա և Հայաստանը կհաղթահարի ներկայիս իրավիճակը:

Աղբյուր

Հարգելիներս,
հայցում ենք Ձեր ներողամտությունը մեր բլոգի՝ մոտ մեկ շաբաթ արտացանց (offline) լինելու կապակցությամբ:

Մեր բլոգը վերաբացվել է (հնարավոր է, որ մի քանի օր տեղ գտնեն որոշ տեխնիկական թերություններ):

ՍԱԿԱՅՆ, Ձեզ հորդորում եւ պահանջում եմ. եկեք այս մի քանի օրվա ընթացքում (մինչեւ մարտի 20-ը) պահպանենք ՀՀ նախագահի հրամանագրում ամրագրված կետերը:

Հիշենք մեկ անգամ եւս, որ

...արգելվում է զանգվածային լրատվության միջոցների կողմից պետական և ներքաղաքական հարցերի առնչությամբ ակնհայտ սուտ կամ իրավիճակը ապակայունացնող տեղեկատվություն կամ առանց իրազեկման, ապօրինի միջոցառումների մասնակցության կոչեր, ինչպես նաև նման տեղեկատվություն կամ կոչեր որևէ այլ եղանակով և ձևով հրապարակելը կամ տարածելը:

Այսպիսով, եկեք մեր արտահայտություններում եւ մտքերում լինենք հնարավորինս զուսպ (առանց այդ էլ բոլորս գրեգրգռված ենք): Այլապես, մենք ստիպված ենք լինելու հեռացնել այն գրառումները կամ մեկնաբանությունները, որոնք չեն արտացոլում վերոնշյալ կետը:

Կանխավ շնորհակալ եմ:

P.S. Իրավապահներին եւ անվտանգության աշխատակիցներին. բլոգի կառավարիչները եւ անձնակազմը որեւէ պատասխանատվություն չեն կրում գրառման եւ մեկնաբանությունների հեղինակների կողմից արծածվող մտքերի համար:

P.S.-2 Եթե այնուամենայնիվ կարծում եք, որ ունեք մտքեր, որոնք չեն կարող արտակարգ դրության պայմաններում տեղադրվել f5 բլոգում, ապա առաջարկում եմ Ձեր գրառումներն իրականացնել մեր ամերիկյան գործընկերների կայքում:

F5-բլոգի կառավարիչները եւ ողջ անձնակազմը ցավակցում են ս.թ. մարտի 1-ի եւ լույս մարտի 2-ի գիշերվա ընթացքում զոհված հայորդիների ընտանիքներին, հարազատներին, ընկերներին եւ մտերիմներին:

Որեւէ իշխանություն իր մեկ քաղաքացու արյունը չարժի: